رواں سُوئے مدینہ کارواں ہے

فضا دلکش ہے کیف آور سماں ہے

جبیں میری ہے، تیرا آستاں ہے

زمیں کے ذرے گردُوں کے ستارے

ہر اک شے سے تری قدرت عیاں ہے

نہیں موقوف نجم و مہر و مہ، پر

زمیں اُس کی ہے اُس کا آسماں ہے

گئے جس راہ سے اپنے اکابر

اسی پر اپنی منزل کا نشاں ہے

یہ کس نے بربطِ دل آج چھیڑا

کہ ہر تارِ نفس نغمہ کناں ہے

میں اپنی بے بسی پر رو رہا ہوں

رواں سوئے مدینہ کارواں ہے

یہ ممکن ہے وہی دشمن ہو تیرا

زمانے میں جو تیرا راز داں ہے

غلط باتیں نہ کر منسوب ہم سے

ہمارے منہ میں بھی آخر زباں ہے

کوئی پگھلا بھی دل تیرے بیاں سے

سنا تھا تو بڑا شعلہ بیاں ہے

تِرا عاجز، تِرے لطف و کرم سے

تِری تعریف میں رطبِ اللساں ہے