احادیث

سردارِ دو عالم ﷺ کی تقاریر۔ احادیث       افعالِ پیمبر ﷺ کی تصاویر۔ احادیث

یہ رنگِ تقدس ہے نہ یہ بوئے طہارت          ہیں غیرتِ صد وادیٔ کشمیر ۔ احادیث

ہیں کانِ نبی کے در شہوارِ معانی!              کس طرح نہ ہوں معدنِ توقیر۔ احادیث

یوں محو نہ ہوں گے یہ نقوش آج کسی سے          لوحِ دلِ مومن پہ ہیں تحریر۔ احادیث

ہیں جسم کے امراض کی تو لاکھ دوائیں            بیماریٔ دل کی فقط اکسیر۔ احادیث

جیسے شبِ تاریک میں روشن مہِ انور          یوں کفر میں ہیں چشمۂ تنویر۔ احادیث

مشرک سے ہو تکرار کہ ملحد سے لڑائی          ہیں عالمِ دیں کے لئے شمشیر۔ احادیث

بنیادِ احادیث ہیں قرآن کی آیات          قرآن کی آیات کی تفسیر۔ احادیث

جو شدتِ سختی سے ہو پتھر کا کلیجہ،         اس دل کے لئے نشترِ تاثیر۔ احادیث

اخلاق سے تعبیر ہے انسان کا کردار             انسان کے کردار کی تعمیر۔ احادیث

اوروں کا اثاثہ ہے زر و مال و جواہر

ہیں عاجزؔ خوش بخت کی جاگیر۔ احادیث