نظم

پھر فرقہ بندیوں کے تعصب کو چھوڑ دو

جو اینٹ بت کدے کی نظر آئے توڑ دو!

مخلوق کے قلوب کو خالق سے جوڑ دو

باطل اٹھائے حق پہ اگر چشمِ خشمگیں

تم اہلِ حق کا فرض ہے وہ آنکھ پھوڑ دو

تم ایک ہی رسول کی امت میں ہو اگر

پھر فرقہ بندیوں کے تعصب کو چھوڑ دو

مکر فرنگ کر دو زمانے پہ آشکار

مغرب زدہ کا رخ بھی سوئے کعبہ موڑ دو

مظلوم کی مدد میں کرو جان تک فدا

ہر اہلِ ظلم و جور کی گردن مروڑ دو

حاجت تمہارے خون کی ملت کو ہو ا گر

خونِ بدن کا آخری قطرہ نچوڑ دو

اعمالِ بد جو موت چھڑا دے گی ایک دن

بہتر ہے زندگی میں انہیں خود ہی چھوڑ دو

منزل کی سمت قافلہ ہونے کو ہے رواں

عاجزؔ جو محوِ خواب ہیں ان کو جھنجوڑ دو