نعت
| ان کا دامن پھول چُن چُن کر سجاتی رہ گئی | زندگی کی ہر ادا دل کو لبھاتی رہ گئی |
| ان کی آمد باعث تزئین صد گلشن ہوئی | ہر کلی فرط حیا سے منہ چھپاتی رہ گئی |
| اک جھلک دیکھی تھی حسن جانفرا کی دُور سے | چشم نرگس فرط حیرت سے لجاتی رہ گئی |
| غنچہ و گل ہر قدم دامن کشی کرتے رہے | بلبل رنگیں نوا نغمے سناتی رہ گئی |
| آبشاروں نے بکھیرے نغمہائے دلفروز | موج دریا رقص کرتی گنگناتی رہ گئی |
| بے نیازانہ وہ گزرے اس ہجوم شوق سے | حسن کی ہی اک ادا ان کو بلاتی رہ گئی |
| جلوہ حسن ازل بھی ناز پرور بن گیا | بے نیازی کی ادا دامن بچاتی رہ گئی |
| ان کی یادوں نے دیا تھا جذب دل کو اک ثبات | ترک الفت سے جنوں کی بے ثباتی رہ گئی |
| ہم نے ہی اسرار آنکھیں پھیر لیں دیوانہ وار | زندگی ہر ہر قدم پر مسکراتی رہ گئی |
