نقش ہو دل پر نقشۂ احمدﷺ
لب پہ ہو جاری نغمۂ احمدﷺ
کب سے ہے پنہاں، دل میں یہ ارماں، رحمتِ یزداں سے ہو نمایاں
صورتِ تاباں، جلؤ احمدﷺ
رہبرِ آدم، محسن عالم، اسم معظم حسن مجسم
نیر اعظم، چہرۂ احمدﷺ
شکل میں اجمل، عقل میں اکمل، خلق میں افضل، نطق میں فیصل
جامع و مجمل خطبۂ احمدﷺ
بہتر و برتر، طاہر و اطہر، ساقیٔ کوثر، شافع محشر
اللہ اکبر رتبۂ احمد ﷺ
محضرِ شفقت، چشمۂ رحمت، مخزنِ حکمت، معدنِ برکت
منبعِ شہرت شہرۂ احمدﷺ
جانِ محبت، کانِ مروت، بحرِ سخاوت، فخرِ رسالتﷺ
ختمِ نبوت عہدۂ احمد ﷺ
صاحبِ عظمت، مالک سطوت، نورِ ہدایت، شمعِ صداقت
مظہرِ رحمت دیدۂ احمد ﷺ
جرم سے نفرت، ظلم سے کلفت، حلم سے رغبت، علم سے الفت
وعظ و نصیحت اسوۂِ احمدﷺ
حق کا دولارا، نبیوں میں نیارا، آنکھوں کا تارا، دل کا سہارا
رشتوں میں پیارا رشتۂ احمد ﷺ
ان کی محبت، ان کی اطاعت، وجہ مسرت، باعثِ راحت
جنتِ عشرت کوچۂ احمدﷺ
گھر کو جلائے، زر کو لٹائے عاجزؔ جائے، مقصد پائے
ہو کے فدائے جادۂِ محمدﷺ